Mirin, Oh Mirin

Ringphaching machima ringshiching machipai
Mikumo pheikar manatda makakhui
Lan nganantap khaleina ringkapha maning
Khikha makhaleinala ringkapha machirar
Kali haophok kali tang makathei mirin.

Sakhuipai ringkashi ringkapha
Kha khipakhana masemngai akhama kaho
Leilakla okathuili ringkapha mi?
Lan mangli kakharom mirin:
Ina nali lokhuishap, ana ili lokhuipai
Hiyakha paila kharing kaho?
Ngachei haira Chang okathui ngacheeya.
Awo ayee thotwui saikhalem thada maringlui kapai:
Ameowali ngacheesai, mangacheeluima khipakhali
Ithum kali vara malaihao, atazan makathei mirin.
Shokluilo machilala kashokka zimik thada
Mashokluipai na iwui mirinva.
Ngaponza fasila kateiwui, mamila khipakhali?
Phungvapaila atazanramli nana kazip kasang laan?
Machuklu, machukluilo
nana semkakaram nali khorumchingra.
Nana sakakhairam nali khonshira naothot naothot.

This poem speaks about the vanity of life

Raitha Mihao Atam

Matun ngaireo tunhaowa Zimik
Makum khangai kazingla kumluiura
Atamna kasing mikumo shongzala
Manarsingpai karphalung-nga shingashong.
Somkhangai apamwui eina khangthuishap
Paropngaiching kachi ning-ngaila shimanmi,
Khamana atamla ngahunmihai
Khipanakha makhayui atam pangthem.

Ngapak khavai rasamkaphang pheikar
Phaningching khavai otsak sakrumhai
Mahanung mara atambing chi vaolala
Khanishi mawon kapai mirin riyan.
Raitha mihao Imangli ajava atamna,
Mazangta khangai yur katei luiramli
Ringkapha khi leira kahao kapam;
Ngashanla makhamalan kaphung zingshoram.
Ngasotnao, ramnao, shimkhur phaningungching
Ningtha sangmi kahaiwui kachot sarisak
Malairekda malai kapaiva maning
Kar-rum zatrum kahai ringkapha otsakbing.

Nganuingaishon, yaron ngala sangaichingnga
Makar ngaireo karda thuihai rasai pheikar
Kashi maphenpai khangachei hupta
Kapar ngavai khamarar mari ngalungla.
Mangshong ngasa kahai aya kaho
Makot kapai wuklungli ngayinsai
Mapingasakpai ringpha khangasak kachihan
“Atamlungli zakmai zingkumna ngacheihailala,
Samphang luira leishikhamatai Iyarnaobingli
Makhangachei zingsho kaphungram chili.”

*** A tribute to all the members of Timrumshon Yar, and Tangkhul alumni of D.M College of Arts Imphal.